1336 Januar 9. Brieg

Privileg für das zu erbauende dominikanerkloster.

In nomine domini amen. Quoniam ut ait apostolus omnes stabimus ante tribunal Christi, ut recipiat unusquisque, prout gessit in corpore, sive bonum sive malum, necesse est diem messionis extreme misericordie operibus prevenire, ut elemosinis et misericordiis pauperum peccata deleantur ac pietatis operibus future vite premia comparentur et in finali judicio dampnacionis perpetue verbum asperum devitetur, hinc est, quod nos Boleslaus dei gracia dux Slezie et dominus in Legnicz et in Brega pro salute progenitorum nostrorum, nostra, consortis nostre vive et defuncte, filiorum nostrorum de consilio maturo ac bona deliberacione dedimus et damus in hiis scriptis granarium nostrum de lateribus constructum in Brega super murum civitatis ejusdem cum uno pariete situatum et totam aream nostram, que a fine ejusdem granarii versus orientem incipit et protenditur versus castrum usque ad fossatum parvum, quod a fine curie versus occidentem domini Gnemeri de Stachow incipit et protenditur ad murum civitatis ejusdem, versus meridiem vero clauditur una platea, versus septemtrionem vero muro concluditur civitatis, fratribus predicatoribus provincie Polonie pro monasterio ordinis eorum ibidem ad perpetuum cultum divini nominis construendum et hoc libere ab omnibus exaccionibus, vigiliis, ac quibuscunque precariis, angariis et perangariis, quibuscunque nominibus censeantur, concedimusque eis, ut aream suam undique muro, ut libet eis et expedit, circumdent, ita ut ex utraque parte aree orientis et occidentis dictus murus usque ad murum civitatis inclusive protendatur, nec debet esse porta seu transitus civium vel quorumcunque aliorum inter murum civitatis et fratrum aream predictorum. Insuper concedimus eisdem de gracia speciali, ut quecunque et quocienscunque voluerint edificent absque licencia cujuscunque libere, sicut voluerint eisque expedierit, super murum dicte civitatis nostre, quantum corespondet longitudini aree ipsorum, dormitorium suum ac alias singulas officinas, ita quod semper murum dicte civitatis nostre, quantum ut diximus correspondet aree ipsorum, damus eis pro pariete uno, et alium parietem intra civitatem edificare libere valeant muro correspondentem in suis singulis officinis, turrim vero pro secreto suo commodo edifice libere valeant extra murum dicte civitatis, ubi eis in opposito aree versus Odram visum fuerit, per quam etiam possint libere Odram meatu perpetuo ducere ad immundicias expurgandas. Insuper dedimus et damus eisdem fratribus conventus Bregensis, quod possint libere absque cujuscunque impedimento, quocunque nomine censeatur, in omnibus silvis ducatus nostri in districtu Bregensi ex utraque parte Odre, ubicumque voluerint, tempore perpetuo ligna jacencia, quantum habent pro igne necessaria, pro suo conventu deducere, ligna vero stancia, quantum pro edificiis totius dicti conventus necessaria fuerint, resecare ac deducere, et similiter si jacencia deficerent, possint libere stancia, quantum pro igne in dicto conventu necessaria fuerint, resecare et ad conventum dictum absque contradiccione qualibet deportare. Insuper dedimus et damus dictis fratribus, ut in pratis nostris in districtu Bregensi ex utraque parte Odre equos dicti conventus, ubi voluerint, pascere valeant, gramina tempore estivo pro equis eorum falcare et ad conventum libere deportare ac de feno ad viginti caratas in eisdem pratis nostris, ubi voluerint, falcare et ad dictum conventum pro equis eorum libere deducere pro tempore hyemali. Insuper piscaturam nostram dedimus et damus fratribus ejusdem conventus in Odra a ponte incipiendo usque ad ultimum molendinum versus Brezin libere et inclusive. Insuper volumus et ordinamus, ut nullus vel nulli nobiles vel ignobiles milites cives militares sive rustici judices curie advocati, consules, scabini vel sculteti et alii domini temporales sive magistri vel quorumcunque operum artifices terre nostre, quocunque nomine censeantur, aliqua statuta vel ordinaciones, mandata, sive alia quecunque edicta, quocunque nomine censeantur, faciant vel fieri procurent directe vel indirecte per se vel per alium sive alios, occulte vel manifeste nec ad haec fienda dent mandatum, consilium, eo modo quo premittitur, auxilium vel favorem, per que dicti fratres conventus predicti in eorum libertatibus et graciis a sede apostolica et a nobis eis datis et concessis possint vel valeant aliquatenus impediri. Quicunque vero contrarium in premissis vel in aliquo premissorum fecisse directe vel indirecte occulte vel manifeste per se vel per alium sive alios inventus vel inventi fuerint, cujuscunque condicionis vel status sive dignitatis existant, cum omnibus rebus suis mobilibus vel immobilibus gracie ducis, qui pro tempore fuerit, subjacebunt. Decet enim, eos, qui omnibus renunciatis Christo pauperi in voluntaria paupertate (vivunt), ab omnibus beneficiis et libertatibus refoveri. In cujus rei evidenciam pleniorem presentes dedimus nostri majoris sigilli munimine consignatas. Datum et actum in Brega tertia feria proxima post diem epiphanie domini anno ejusdem millesimo trecentesimo tricesimo sexto. Presentibus nostris fidelibus Borutha seniore de Stachow, Jeschone de Berndorph militibus, Johanne Rimberg, Ramvoldo de Schiltberg, Henrico Landiscrone, Henrico judice curie in Brega, magistro Stancone canonico Wratislaviensi et Johanne de Schellindorph nostro protonotario, qui presentes a nobis habuit in commisso.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 9, Urkunden der Stadt Brieg. Urkundliche und chronikalische nachrichten über die Stadt Brieg, die dortigen Klöster, die Stadt- und Stiftsgüter bis zum Jahre 1550. Hrsg Dr. C. Grünhagen, Breslau 1870.